خراف الحوار

يا حزاركم يا مزاركم
وين وصلتوا بحواركم
تغطوا في سر أخباركم
اللي باين حسن جواركم
والمدسوس بعاركم
فرقة وعناد مساركم
حاكم ليون زمامكم
يخطط يلعب في فاركم
يبيع الجبنة لي جاركم
مشيتوا وجيتوا بفراقكم
جبتوا محتل لداركم

مشيتوا ليكم عام ونص
مطالب تترص
لزوز فراقة يبوا النص
واحد ملغي حكمه بنَص
ولاخر عالرجعة يفنص
نسون تجري وتتروقص
لتقسيم حصص
ولقاقة تتبع وتبص
اللي هذا فيبرة ينخص
مشيتوا وجبتوا معاكم فص
جبتوا الحصرم لصغاركم

مشيتوا ركبتوا طيارات
بتنسوا اللي فات
سكنتوا فافخر هوتيلات
لبس افرنجي وموديلات
تمر الساعات
خشرة وعشرة وسهريات
ليون يخربش مسودات
يجهز فأوقات
يمرر لحكومة بيعات
مشيتوا وجيتوا نوم سبات
جبتوا وصاية لبلادكم

مشيتوا تبوا تديروا حس
تنسوا الخنس 
سيبتوا تريس مكدس
رفعتوا معاكم كوم سوس
بفكر مفلس
اللي هذا يحفر ويعس
للمنصب يلهدله فرس
زمزاكة للنمس
غرضه للفرقة مكرس
مشيتوا وجيتوا زينة وبس
جبتوا القهرة اختياركم

يا حزاركم يا مزاركم
حاشا بعض اخياركم
ليون مطيح مزالكم
مشاكم غادي وجابكم
وشعب يراجي فعماركم
بقرار يعشي صغاركم
وحكومة تبني دماركم
توقف نزيف اولادكم
مشيتوا وجيتوا بحماركم
جبتوا قرصة لودانكم
وهذي سوالف موالكم

طرابلس

11 October 2015 ·