نخبك يا وطن غشوه، كاس البيرة أويا بعصير بويا بدلوه، ولأويا قطروه، وأويا أويتهم بوه على خوه، قليلين اصل مأواهم نسوه، وأويا أويا تفيق من سكرة البويا وتأوي وطن من جد الجد لعمه وبوه.

                                                                                 

يا وطن نخبك كسروه، مالكفرة لفزان شرتعوه، ونخلك قلعوه، واللاقبي لوراء الحدود باعوه، الما عارف جِذره من قدره ركام في الصحرا ندفنوه، وكسر كاسك مالحد للحد بطيبة هلها يلموه ويجبروه.

                                                                                 

نخبك يا وطن سرقوه، للغازي فبنغازي سقوه، وكاسك سمموه، وولدك فشجرة علقوه، فسكرة غدرة سمهم يلعقوه وسمسارك يلعن اصل بوه، وبنغازي ترجع بنغازي تربيله الدايح خوه.

                                                                                 

يا وطن نخبك شوهوه، من سرت لدرنة دعشوه، حلال عليهم سُكره علينا حرموه، بدمك الكاس عبوه، حرمت عيشتهم الحرام كلوه، اللي دهشنا نديدشوه فـ يمك نغرقوه، وشطك يمد ايديه للي يبوه.

                                                                                 

نخبك يا وطن داسوه، من جبل كاسك كفوه، والساحل لي ساحر بالجيفة ردموه، وسُكرك في مداين مالغيظ كرهوه، النذل اللي داسك بمداسك نرفسوه، يخطاه شرابك ياسر واخيار ناسك يتلقوه.

                                                                                 

ونخبك يا وطن فيوم نطقوه، كاسك فأويا نصنعوه، بدقلة من الكفرة وخضراية فزان نقطروه، فبنغازي سبع ليالي نزفوه، ومن سرت لدرنة نرقصوه، وليلة فقرية ليلة فمدينة فوق الجبال نفرقوه، على طول الساحل بدوم افراحك شرابك نسكروه.