عادي عاااادي!!!!عاش من عاش،،،، ومات من مات
حكومات تتصارع قدام الشاشات
اللي هذا شيطانه عارفه وين يبات
ومكتر الناشطين وخبراء التحليلات
ومجتمع مدني يجمع في البومات
واللي فالح يزمزك ويلحق عالفتفات
والشعب يا كباااادي!!!!
الشعب قاعد عايش في سبات
راقد يحلم يفتك من هالشكالات
وفايق يحلم بعيشة تبات ونبات
الحلم كبير كبير والفعل هيهات
يدور في مارد يحل له الازمات
كل شي يبيه مستف فـسابات
تي زيد غاااادي!!!!
عادي يعتصم ويكدس الطلبات
وعادي يفرح بتسكير الطرقات
وعادي عادي المهم المعاشات
عادي خدم هلبة ويبي اجازات
وراك تنشده علي غيابه ايامات
رزق حكومة وحقه في الثروات
قالك مش رااااضي!!!!
عادي ولده يغش في الامتحانات
وعادي يكتبله بـإيديه الواجبات
وعادي عادي نتيجته امتيازات
عادي يبيه يطلع حامل شهادات
وحقه يعيط عـالطب والخدمات
دولة غنية ولازم توفرله الخبرات
تي تي اما هااااذي!!!!
عادي ينقد وينتقد ويكدس العلات
وعادي رايه أوحد معصوم مالزلات
وعادي عادي راي غيره كله عورات
عادي كان عجبك! وممنوع الملامات
بيتمتع بالحرية وكدسها مخالفات
ينادي بديمقراطية وقلبها خلافات
مالودن هاذي لهااااذي!!!!
عادي يتبع في تفتفيت القنوات
وعادي يتصنت في الإشاعات
وعادي عادي يلت زي الببغاوات
عادي الفتنة ولت علم تكتيكات
وخبر كاذب ولا تفوت اعجابات
شهرة الفيس تفتحله المجالات
الجهوية لا يا اولاااادي!!!!
عادي يرفض العنصرية والتكتلات
وعادي في الوسع يطالب بكفاءات
وعادي عادي يدور في الواسطات
عادي يتملق لاصحاب الوجاهات
تربى عالنظرية وسماع الهتافات
خود وهات ومصلحتك وين تبات
تي لوح فواااادي!!!!
عادي ينسي هاذيكا الايامات
وعادي يقبل تُحكمه وصايات
وعادي عادي يرجع عبد للممات
عادي الجايات خير مـالماشيات
ومسهل قولته الله يرحم اللي فات
مستسهل الخونة ولبس عبايات
تي عادي وستين عادي!!!!
وعاش من عاش ومات من مات
وسلامات يا هالشعب سلامات
كان جي عباكم علي الحكومات
هما منكم وانتو اماليهم قدوات
هذي تربيتكم ردتلكم القرامات
عادي عادي الله يرحم اللي مات
طرابلس
9 January 2016
ليست هناك تعليقات:
إرسال تعليق